Hvað takmarkar jarðavarmaorkuna í 101 ?

"" Þótt fólk virðist nú loks vera að átta sig á að jarðvarminn í landinu sé takmörkuð auðlind, heyrist lítið um að tryggja að hann nýtist framtíðarkynslóðum um alla eilífð, segir Elín.""

það eru bara  öngvir að átta sig á þessu í minni sveit.  Þar dæla menn endalaust heitu vatni upp úr holum og þær virðast bara batna við það. Vill einhver 101 Jarðavaramorkufræðingur útskýra fyrir okkur sveitalúðunum hvað það er sem takmarkar svona mikið jarðavarmaorku í Reykjavík. Eru menn hræddir um að möttullin kólni eða ?

Á að fullnýta orkuna...?

Athugasemdir

[Höskuldur Búi Jónsson, 14.11.2012 kl. 15:12]

Ég skil ekki þennan "við sveitalúðar á móti 101 liðinu" hugsunarhátt.

Þótt ég telji mig hvorki vera sveitalúði, né 101 jarðavarmaorkufræðing (ef það er nú til) þá tel ég mig skilja að einhverju leiti takmarkanir jarðvarmakerfa:

Mikil dæling - þýðir að innstreymi kalds vatns eykst inn í kerfið og kælir það. Ef ekki kemur nýr varmagjafi inn í kerfið (innskot), þá heldur kerfið áfram að kólna þar til það er of kalt til að nýta það. Eftir einhverja áratugi getur slíkt kerfi þó náð einhverju jafnvægi á ný, ef það er friðað.

[Jonni jarðvarmafræðingur (IP-tala skráð) 14.11.2012 kl. 17:26]

Sælir piltar.

Varmagjafinn í borholum er bergið sjálft. Vatnið sem lekur í æðum bergsins er miðlunarhluti varmans, ýmist í vökvafasa eða gasfasa sem heitt vatn í hitaveitur eða gufa í jarðvarmavirkjanir. Það er ekki sama um hvort ræðir, en háhitahola og lághitahola lúta sínu lögmálinu hvor. Það er rétt að gufuaflsholur þverra á ákveðnum tíma og það þarf að bora nýjar holur í kerfið til að halda áfram að virkja varmann úr því. Til að miðlarinn (vatnið) haldi áfram að miðla varmanum um ókomna tíð þarf í flestum tilvikum að dæla niður vatni til að fylla á miðlunarkerfið. Varminn er áfram í berginu og verður löngu eftir að mannkynið er útdautt. Við þurfum ekki að hafa áhyggjur af því.

[Ómar Ragnarsson, 15.11.2012 kl. 00:02]

Hér eru nöfn helstu íslenskra vísindamanna og kunnáttumanna á sviði nýtingar jarðvarmaorku til rafmagnsframleiðslu síðastliðin 40 ár:

Guðmundur Pálmason, Jóhannes Zoeaga, Sveinbjörn Björnsson, Jónas Ketilsson, Guðni Axelsson, Bragi Árnason, Stefán Arnórsson, Sigmundur Einarsson. Allir á einu máli um endingu háhitans í íslenskum jarðvarmavirkjunum, sem framleiða rafmagn.

Ég hef ekki enn heyrt um neinn vísindamann, sem heldur öðru fram.  

Að baki áætlunum þessara manna, sem giska á að jarðvarminn í háhitavirkjunum okkar endist að meðaltali í 50 ár, liggja ótal álitsgerðir Orkustofnunar sem allar hníga að þessu sama.

En hér að ofan er tilgreint aðalatriðið um það að þetta séu allt saman vitleysingar: 101 Reykjavík.

Þar með eru allt starf þeirra og rannsóknir í áratugi á jarðvarmasvæðunum tómt bull og vitleysa. Sömuleiðis væntanlega allt það sem ég hef skrifað og sagt um umhverfismál, af því að ég lærði í skólum í 101 Reykjavík í nokkur ár, þótt ég hafi aldrei átt heima í 101 Reykjavík síðan ég var tveggja ára og ævistarf mitt og starfsvettvangur liggi að mestu utan höfuðborgarinnar. 

En "101 Reykjavík" upphrópunin, hún nægir ásamt viðbótinni: "Lattelepjandi kaffihúsalýður." Hef ég þó aldrei drukkið kaffi á kaffihúsum Reykjavíkur.

Svipað gildir væntanlega um Fjölnismenn og Jón Sigurðsson af því að þeir voru í Kaupmannahöfn, sem er auðvitað enn verra en Reykjavík og sáust þar á kaffihúsum að lepja kaffi á sama tíma og landar þeirra sultu og skulfu í torfkofum í vegalausu landi.

Gott að vita þetta.

[Jonni Jarðvarmafræðingur (IP-tala skráð) 23.11.2012 kl. 01:55]

Sæll Ómar.

Það er heldur hæpið að nefna t.d. Jónas Ketilsson í sömu andrá og aðra, þar sem hann er  ungur maður og hefur ekki stundað rannsóknir á háhitasvæðum landsins beint, heldur komið að leyfisveitingu virkjana. Dæmi um áróður.

Þessi 50 ár miða við að engu sé dælt niður eða aðrir gufupúðar fundnir á hverju virkjanasvæði fyrir sig, auk þess sem það er mjög misjafnt milli svæða hvað þau endast lengi. Þar að auki er ekki gert ráð fyrir að nýjar aðferðir verði uppgötvaðar, sem verður að teljast ósennilegt.

[Jonni Jarðvarmafræðingur (IP-tala skráð) 30.3.2013 kl. 03:23]

Jæja.

Ég sé að fleiri ætla ekki að leggja til máls og skoðast það sem svo að síðuhöfundur hafi nokkuð til síns máls. Hvað segja efasemdamenn?